,,Ísland í bítið" hættir í sjónvarpi eftir að föstudagsþættinum lýkur. Þetta á eftir að koma óþægilega við marga. Því við erum flest vanaföst á morgnana. Aldrei er líf manns eins vanabundið og á morgnana þegar haldið er út í daginn. Og fjölmargir hafa vanist því að koma sér af stað með sjónvarpinu, morgunkaffi, blöðin, fréttir og spjall í sjónvarpinu. Það hefur líka verið gífurlega gaman að taka þátt í þessu. Skemmtilegur vinnufélagi - Heimir Karlsson - og margir fleiri dásamlegir félagar sem hafa byrjað daginn snemma með manni undanfarna mánuði. En við eigum ekki stöðina og þeir sem eiga peningana ráða. Það hefur því verið ákveðið að spara, færa til fjármagn og breyta þættinum yfir í ,,Bítið á Bylgjunni" - enda mjög margir sem hlusta á útvarpið í bílnum á leið til vinnu. Ég hef hins vegar áhyggjur af þeim sem vinna heima, eru heima með börn, eru í vaktavinnu eða eru bara hættir að vinna og finnst notalegt að hafa þennan félagskap sem morgunsjónvarp er. Þeir munu vonandi sakna okkar þar til þeir hafa vanist því að vakna með Bítinu á Bylgjunni.

Breytingar hafa hins vegar alltaf verið til góðs í mínu lífi. Og það eru spennandi tímar framundan. Ég fæ fleiri skemmtileg tækifæri á Stöð 2 - enda kraftmikill vinnustaður þar sem verkefnin eru næg. Við Heimir verðum til að byrja með í Bítinu á Bylgjunni en með hækkandi sól fer ég yfir í kvölddagskrá Stöðvar 2. ,,Örlagadagurinn" fer aftur í loftið á Stöð 2 í vor. Ég hlakka til en það verður samt leitt að sjá á eftir góðum félögum og vinnudegi sem er svona óvenjulegur - erfiður, en líka skemmtilegur. Þá er bara að vona að manni takist að halda samt áfram að vakna snemma! Ég treysti því á að Bítið á Bylgjunni verði það skemmtilegur morgunþáttur að hann veki mann eins og hressandi hanagal á morgnana þegar haldið er út í vinnu við ,,Örlagadaginn."

Allar ábendingar um góða viðmælendur eru vel þegnar. Ég er þegar komin með lista yfir spennandi gesti í þáttinn. Lumar þú á góðum ábendingum? Sendu mér línu.

Kveðja,

Sirrý

Ég er búin að fá alveg nóg af fréttum af öllum þessum ökubrjálæðingum sem aka um á 200 kílómetra hraða, jafnvel án ökuréttinda, búið að stoppa þá aftur og aftur og samt halda þeir áfram að ógna lífi sínu og annarra á þjóðvegum landsins - jafnvel dauðadrukknir eins og maðurinn sem var tekinn í Hvalfjarðargöngunum um daginn. Þessar hræðilegu fréttir berast mörgum sinnum í viku. Og hvað gerist svo þegar dauðadrukkinn ökumaður þjösnast áfram á 200 kílómetrahraða á flótta undan lögreglunni? Hann er látinn sofa úr sér, yfirheyrður, sektaður og er SLEPPT. Gissur Sigurðsson fréttamaður sagði í Íslandi í bítið um daginn að í Noregi væri svona mönnum umsvifalaust stungið í fangelsi og látnir taka úr harða refsingu. Er ekki kominn tími til að við förum að taka harðar á þessum ökubrjálæðingum??? Hvað finnst þér?

Ég sat um daginn hjá litlum dreng, Nóna 8 ára gömlum sem er lamaður fyrir neðan mitti eftir árekstur og búinn að missa litlu systur sína hana Þulu í umferðarslysi. Þetta er sorglegra en orð fá lýst. Þjóðin finnur öll til með þessari fjölskyldu og við viljum öll geta gert eitthvað til að lina þjáningu þeirra. Það er bara svo lítið hægt að gera.

Nema aka varlega, bæta umferðarmenninguna og herða refsingu til að stöðva þessar tímasprengjur sem æða um vegi landsins - jafnvel próflausir, blindfullir og hafa sumir oft verið gripnir áður. Nú er komið nóg. Í fangelsi með þá sem fremja svona glæpi.

Hvað finnst þér?

Kveðja,

Sirrý

Heil og sæl.

Hér að neðan eru nýjustu bréfin sem Bryndís Schram talaði um í Íslandi í bítið. Að sjálfsögðu er þessu lítillega breytt svo enginn þekkist og Bryndís fær alltaf sólarhring til að hugsa málið áður en hún svarar bréfunum í þættinum.

Ef þú vilt skrifa Bryndísi þá er netfangið: bitid@stod2.is En hér eru síðustu bréf.

Hverju hefðir þú svarað? Sendu línu.

Kveðja, Sirrý

,,Sæl Bryndís.

Ég hef áhyggjur af barni sem býr í hverfinu. Þetta er 8 ára telpa, sem er mikið ein heima og mér fannst hún vera áhuggjufull fyrir jólin. Hún kíkir stundum til mín í heimsókn og segir alltaf að allt sé í lagi heima og þau eru alltaf með mikil plön um hitt og þetta skemmtilegt sem á að gera heima hjá henni en svo virðist ekkert vera gert. Hún þarf aldrei að koma heim á sérstökum tíma og það eru ekki fastir matmálstímar hjá þeim. Um áramótin í fyrra var mikið drukkið og mikill gestagangur fram á næsta dag heima hjá henni. Hávaðinn og ólætin ærðu alla í götunni. Hún er eina barnið í fjölskyldunni og var heima - ég veit það því hún heimsótti mig á Nýársdagsmorgun og hafði þá ekkert borðað og allir voru sofandi, gestir út um allt. Skyldi þetta endurtaka sig í ár? Kannski eru þetta óþarfa áhyggjur er ég veit ekki hvort þetta sé barni boðlegt. Ætti ég að gera eitthvað?

Kveðja,

Áhyggjufullur nágranni

,,Sæl Bryndís

Það er eitt að pirra mig í fjölskyldunni minni. Tengdamóðir mín, fullorðin kona, er aldrei nokkur tíman ánægð með það sem henni er gefið. Hún er hjá okkur á hátíðisdögum og fær fullt af gjöfum. Hún á 6 börn og mörg barnabörn og allir reyna að gefa þessari fullorðnu konu fallegar gjafir. En hún er aldrei ánægð. Ekki í eitt skipti hefur hún sýnt þakklæti eða gleði yfir gjöfunum. Hún fer strax að tala um að skipta gjöfunum og biður mig að keyra sig í Kringluna eftir jólin. Það er alltaf eitthvað að öllum gjöfum. Henni finnst, held ég, slæmt þegar þetta er heimatilbúið því þá er ekki hægt að skipta. Ég held hreinlega að þetta sér einhver FÍKN eða skiptiárátta hjá henni. Ég get ekki hugsað mér að fara eina ferðina enn í skiptileiðangur. Við höfum nokkrar í fjölskyldunni farið í þessar ferðir en ég er búin að fá nóg. Annars er allt ágætt við hana. Ég bara skil þetta ekki. Ætti ég að hafa orð á þessu við hana?

Kolla".

P.s. Sjálf er hún hætta að gefa gjafir svo ég get ekki skipt pökkunum frá henni, til að sýna henni hvernig þetta er.

K.

Ég tek undir með þeim sem eru búnir að fá nóg af skömmum út af eyðslu og annríki í aðdraganda jólanna. Hjónin séra Jóna Hrönn Bolladóttir og séra Bjarni Karlsson komu í Ísland í bítið fyrir jól og ræddu um það að annríki sem hefur tilgang er af hinu góða. T.d. eins og undirbúningur jólanna en þá erum við að gleðja aðra og gera vel við okkar nánustu vini og ættingja. Hvað er neikvætt við það ef það er innan skynsamlegra og viðráðanlegra marka?

Og þessar himinháu tölur sem birtast í fjölmiðlum og sýna eyðslu þjóðarinnar fyrir jólin eru ekki allar þar sem þær eru séðar. Fyrir jólin drífum við oft í hlutum sem hafa staðið til mánuðum saman og framkvæmum loks það sem þarf að laga, breyta og bæta á heimilinu af því að við viljum hafa fínt um jólin. Og einhverju þarf fólk að klæðast. Margir kaupa föt af mikilli skynsemi fyrir jólin, eitthvað sem nýtist fyrst sem spariföt en nýtist svo áfram sem hvunndagsfatnaður. Þetta er ekkert óhóf. Og hvað er skemmtilegra en að gera vel við sig í mat og drykk og elda eitthvað sérstaklega gómsætt fyrir þá sem standa manni næst? Þetta er bara hið besta mál.

Auðvitað eru þeir til sem hugsa ekkert um annað en rassinn á sjálfum sér og eyða og spreða fyrir jólin í einhverja fáránlega dellu. En það á ekki við um þorra landsmanna. Þetta eru bara eðlileg útgjöld hjá flestum. Og ef við keyptum ekki þessa hluti fyrir jól þá dreifðist það bara yfir árið.

Það sem ergir mig er að til er fólk hér á landi sem ekkert á og þarf að standa í biðröðum hjá hjálparsamtökum svo það eigi jólamat og nauðsynjar. Það er eitthvað mikið að þegar fámenn, forrík þjóð getur ekki kippt svona málum í lag svo 4.600 börn, aldraðir og öryrkjar og fleiri líði ekki skort. Við hljótum að geta lagað þetta í sameiningu.

En það er líka fátækt fólk á Íslandi hina mánuði ársins Og það ætlum við að skoða og fjalla um í Íslandi í bítið á nýju ári. Heimir Karls kemur bráðlega úr jólafríi og við munum spá í raunverulega fátækt á Íslandi næstu vikur.

Viltu leggja eitthvað til málanna? Endilega sendu línu.

Kveðja,

Sirrý

Það loguðu allar símalínur í Íslandi í bítið í morgun þegar við vorum að ræða um Kompásþáttinn síðasta. Þar var, eins og alþjóð veit, rætt um ásakanir á hendur Guðmundi í Byrginu um að fara illa með opinbert fé og misnota skjólstæðinga sína kynferðislega. Þetta er svakalegt mál. Og það kom okkur morgunhönunum á óvart að allir þeir áhorfendur sem komust að voru ósáttir við Kompásþáttinn, fannst ekki tekið tillit til þess að forstöðumaðurinn á fjölskyldu og börn og einn benti á að dómstólarnir ættu að fjalla um svona mál en ekki sjónvarpið. En það eru margar hliðar á þessu. Hvað á fréttamaður að gera sem fær svona upplýsingar í hendurnar, með símamyndum þar sem viðkomandi berar kynfæri sín og er ógnandi. Á hann að láta þar við sitja, salta upplýsingarnar? Á ekki að hugsa um hag skjólstæðinganna sem komu varnarlausir og í slæmu ástandi inn á meðferðarheimilið og treystu á yfirmanninn? Það er viðkvæmt sambandið milli ,,læknis" og sjúklings.

Þátturinn hefur sannanir máli sínu til stuðnings úr mörgum áttum. En hvað finnst þér, á umfjöllunin rétt á sér?

Sendu línu.

Kveðja,

Sirrý

Bara að minna á að Ísland í bítið er með mjög rausnarlegan fjölskylduleik í gangi.

Við byrjum í næstu viku og drögum út vikulega eina ferð fyrir alla fjölskylduna til útlanda. Fyrsta vinningsferðin verður til Kanaríeyja eða Tenerife. Við Heimir snérum okkur til ferðastkrifstofunnar Úrvals Útsýnar með þessa hugmynd, og var vel tekið svo nú er bara um að gera að senda tölvupóst á bitid@stod2.is undir yfirskriftinni Fjölskylduferð og sækja um. Þeir fiska sem róa.

Kveðja,

Sirrý

Það er bara ein ástæða fyrir því að ég fer stundum í Krónuna: verðið.

Reyndar fer ég oftast í Bónus en nú um helgina fór ég í verslunarferð í Krónuna og reyndi að vera hagsýn í innkaupum. Þegar ég var búin að borga fór ég yfir verðmiðann (strimilinn) og sá að ég var rukkuð um 1300 krónur fyrir þrjár litlar kakómjólkurfernur!!!

Ég spurði manninn á kassanum hvað hefði gerst? Og hann sagðist hafa skannað strikamerkið of oft og endurgreiddi mér um 1000 krónur og sagði: ,,Svona gerist". Það er alveg rétt, en ég hefði farið sáttari í burtu ef hann hefði beðist afsökunar á mistökunum.

Það er rétt sem fram kemur í bók Ingólfs H. Ingólfssonar ,,Þú átt nóg af peningum, þarft bara að finna þá", að það marg borgi sig að fara yfir verðmiðann í matvörubúðum. Það er gott tímakaupið sem maður fær fyrir að staldra við og renna yfir strimilinn. Ég hvet alla til að skoða vel miðann í hvert skipti sem maður kaupir í matinn. Það er alltaf verið að skipta um starfsfólk og öllum liggur svo á, langar raðir bíða og allir flýta sér að komast með vörunar út. Það er því oft freistandi að flýta sér bara í burtu og kíkja ekki á miðann. En ég er fegin að hafa staldrað við í þetta sinn.

Hver er þín reynsla? Segðu endilega hvort þú kíkir á strimilinn og hvort hann sé alltaf réttur.

Sendu línu hér.

Kveðja,

Sirrý

Mikið skemmtu þingmenn sér vel í dag. Líf og fjör á Alþingi. Mikið hlegið og fast skotið á andstæðingana. (Ég tók eftir því að álag á þingmenn er greinilega mikið, því sjaldan hef ég séð jafn margar þingkonur með jafn lufsulegt hár og í sjónvarpsútsendingu frá Alþingi í dag. En það er ekki það sem máli skiptir.)

Ný orð hafa orðið til undanfarið. Ingibjörg Sólrún var í ágætu spjalli hjá okkur Heimi í Morgunsjónvarpinu um Keflavíkurræðuna víðfrægu sem var innihaldsrík ræða sem mikið hefur verið snúið út úr. En hún svaraði fyrir sig með því að tala um að fylgi Framsóknar væri við ,,Pilsnermörk". Vinur minn sagði svo að Frjálslyndir væru ekki að rífast út um rasisma - heldur væru þeir að rífast vegna RASS-ISMA. Þeir sem ganga með þingmanninn í maganum vilja fá þingsæti - og þeir sem þegar verma stólana vilja halda í sín sæti, svo þetta snýst um RASSISMA.

Annars er það að frétta af mér að ég hef verið með tvær bakteríur undanfarið. Önnur var kvefbaktería, sem ég hélt niðri með hitalækkandi lyfjum, vítamínum og ofnæmistöflum, til að hin bakterían fengi að blómstra: Golfbakterían. Ég var nefnilega svo heppin að geta skotist til Alicante með syni mínum í nokkra daga og þar byrjaði ég að spila golf á Sheratonvellinum flotta og fékk góða tilsögn hjá golfmeistara fjölskyldunnar. Þetta var fráæbært. Ég fékk ,,fugl" á 109 metra holu, þar sem ,,pinninn" var beint fyrir aftan háan ,,bunker". Þetta var kannski byrjendaheppni - en ég er alla vega farin að skilja þetta sérhæfða golfmál og komin með bakteríuna.

Kvefbakterían hefur loksins yfirgefið mig. Góð skipti það.

Kveðja, Sirrý

Ég var að hlusta á útvarpsþáttinn ,,Spegilinn" í kvöld þar sem kom fram að Naustið er hætt og frægar innréttingar staðarins eru komnar á haugana. Naustið hefur frá 1882 sett mikinn svip á Kvosina og Vesturgötu. Þar sátu frægir listamenn innan um gamlar og merkar innréttingar. Þarna borðaði maður þorramat eða fór á árshátíðir einstaka sinnum. Fyrr á árum var þetta einn fínasti veitingastaðurinn. Naustið hefur víst ekki borið sig sem veitingastaður undanfarin ár og því þótti rétt að rífa allt út og nú á að setja upp kínverskan markað eða asískan veitingastað. Kínverjar, sem ekki hafa verið hér með atvinnustarfsemi áður en eru með slíkan rekstur víða í Evrópu, ætla að opna þennan stað með vorinu. Fram kom í Speglinum að ekki er bannað að setja kínverska dreka eða annað skraut utan á þetta fornfræga íslenska hús.  

Mér finnst þetta slæmt. Berum við svona litla virðingu fyrir sögu okkar og menningu. Allt sem ekki skilar arði á bara að víkja. Var ekki hægt að bjarga staðnum með einhverjum hætti? Hafa borgaryfirvöld ekkert með þetta að gera? Það væri kannski rétt að setja McDonalds eða Subway á Þjóðminjasafnið til að safnið skili meiri tekjum?

Kannski er ég bara allt of íhaldsöm? Eða erum við hreinlega kærulaus gagnvart sögu okkar og menningarverðmætum? Hvað finnst þér? Sendu línu.

Ætlarðu að fá þér kínverskar núðlur í gamla Naustinu?

Kveðja,

Sirrý

Ísland í bítið mánudagsmorgun:

Við Heimir verðum með beina útsendingu frá Laugum á mánudagsmorgun þar sem verið er að vinna í að betrumbæta myndverið okkar.

Meðal efnis verður:

,,Sterkasti maður heims" - hin eina sanna keppni eða eftirlýking? Hjalti Úrsus og Magnús Ver takast á.

Pólitísk glíma um tíðindi helgarinnar milli Sæunnar Stefánsdóttur ritara Framsóknarflokksins og Ágústar Ólafs Ágústssonar varaformanns Samfylkingar. Hvað segja þau um orð formanns Framsóknar um helgina? Og hvað fannst þeim um þöglu mótmælin sem fram fóru víða um land til að hvetja dómara til að nýta sér að fullu refsiramma laganna í nauðgunardómum?

Vala Matt blandar heilsudrykki og Sölvi Fannar ræðir um sjálfstraust.

Og Svandís Svavarsdóttir r,æðir um hina nýju lágstétt Evrópu.

Í Morgunblaðinu var áhugaverð grein um helgina um ,nýjan þjóðfélagshóp í óreglu, án stéttarvitundar og menntunar." Þessi nýja lágstétt á að einkennast af upplausn sem er að mati þýska tímaritsins Der Spiegel meiri ógn fyrir Vesturlönd heldur en alþjóðleg hryðjuverkastarfsemi. Og þessir hópar eru sagðir illa talandi, og vegna ólæsis verður æ erfiðara að hjálpa þeim. Metnaðarleysi fyrir hönd barnanna er líka áberandi sem og mikið sjónvarpsgláp á ,,lágmenningarsjónvarpsefni". Og þessir hópar hafa engin tengsl við verkalýðshreyfinguna og halla sér helst lengst til hægri eða yst til vinstri í stjórnmálum.

Í greininni kemur fram að lágstéttin nýja hafi orðið til á síðustu 10 árum og sé að myndast i öllum leiðandi iðnríkjum.

Svandís Svavarsdóttir frá Vinstri Grænum kemur í Morgunsjónvarpið og ræðir þessi mál.

Hvað finnst þér? Sendu línu.

Sem sagt á morgun stútfullur, fjölbreyttur þáttur - sem vekur þjóðina.

Kveðja,

Sirrý

Við Heimir kynntum í morgun nýjan ,,JÓLALUKKUPOTT" þáttarins. Það er til mikils að vinna því ein fjölskylda sem hefur heppnina með sér fær íbúðina tekna í gegn. Þetta er gert í samstarfi við Litaver sem kemur og málar í hólf og gólf, setur teppi, gólfdúka og veggfóður á íbúðina. Allt eftir smekk og þörfum fjölskyldunnar. Við hvetjum ykkur til að senda okkur línu og benda á fjölskyldu sem á þetta skilið og þarf á svona hjálp að halda. Netfangið er bitið@365.is

Endilega segið frá af hverju viðkomandi á þetta skilið. Allir vilja geta gert eitthvað til að fegra heimilið fyrir jólin en því miður þá er hér til fólk hefur alls ekki kost á því. Það er gaman að geta aðstoða eina fjölskyldu sem á það skilið.

Kveðja,

Sirrý

,,Úr reynslubrunni Bryndísar "heitir fastur liður hjá okkur í Íslandi í bítið á fimmtudögum.

Hér eru bréfin sem bárust frá áhorfendum og hún tekur fyrir næst:

Þau fjalla um annars vegar nágrannaerjur og hins vegar eiginmenn sem ,,yngdu upp". Sendu okkur línu og segðu hvaða ráð þér finnst best eiga við. Hér koma bréfin:

,,Kæra Bryndís Mér finnst nágranni minn vera orðinn allt of yfirgangssamur. Við búum í fjölbýlishúsi og nágranni minn sem fæddist í húsinu og hefur búið í húsinu alla sína tíð. Af þeim sökum lítur hann á allt húsið sem sitt og aðra íbúa sem gesti eða tímabundna leigendur. Hann geymir einu lyklana að sameiginlegri geymslu, fer frjálslega með hússjóðinn, velur appelsínugula málningu og teppi að eigin vild á stigaganginn og smekkur hans er hræðilegur. Hvað gerir við maður við svona nágranna? Ein langþreytt."

,,Sæl Bryndís. Við erum tvær konur sem erum með svipaða og erfiða reynslu að baki. Við vorum ,,hamingjusamlega giftar", töldum við, og höfðum búið mönnum okkar og börnum gott heimili, eins og það er kallað. Við erum báðar í sárum því menn okkar fengu skyndilega óstjórnlega þörf fyrir að ,,yngja upp". Þeir fóru á bak við okkur í langan tíma en svo fór að jafnvel börnin mín þrjú voru farin að sjá að það var eitthvað gruggugt í gangi og feluleikurinn var farinn að verða of flókinn til að ganga upp. Allt sprakk í loft upp, einn óveðursdag og maðurinn minn flutti til stúlkunnar (viðhaldsins). Svipað gerðist hjá vinkonu minni. Það má alveg taka það fram að hún er ótrúlega glæsileg og flott kona, svo eftir er tekið. En hún er að bogna vegna niðurlægingarinnar og höfnunarinnar. Nú er komið í ljós að við eigum ekki rétt á lífeyrissjóðsgreiðslum úr lífeyrisjóði eiginmannsins. Við stóðum saman í húsbyggingum, barauppeldi og því öllu og á efri árum á maður ekki neitt nema hálfa íbúð og biturð. Börnin mín eru öll reið en vilja ekki missa tengslin við pabba sinn. Nú þurfa þau að vingast við nýju konuna sem er á fullu að leika hina fullkomnu ,,stjúpmömmu" og á fullu í vinsældakeppni. Sonur minn er að fara að gifta sig og þá þarf ég að sitja í kirkju og í veislu með mínum fyrrverandi og ,,stúlkunni". Hvaða uppörvandi orð áttu fyrir okkur ,,sem var skilað"??

Viltu  þú leggja eitthvað til málanna? Og hvað finnst þér um ráð Bryndísar?

Kveðja, Sirrý

Valgerður Sverrisdóttir ráðherra baðst afsökunar á því að ekki voru gerðar viðeigandi ráðstafanir til að halda við fjölbýlishúsunum á Vellinum eftir að herinn fór. Hún sagði að svona lagað gæti gerst og það vSverrisdóttir ráðherra æri auðvelt að vera vitur eftir á. Svipað tjón hefði t.d. gerst í húsi hennar úti á landi.

Fyrst ráðherra hefur reynslu af þessu er þeim mun furðulegra að ekki skyldu hafa verið gerðar viðeigandi öryggisráðstafanir varðandi þessar tómu byggingar. Hvers vegna kom þetta stjórnvöldum á óvart?

Er þetta ekki dálítið einkennandi fyrir þjóð okkar??? Við vonum að allt reddist og tökum á málum þegar þau koma upp en gerum ekki fyrirbyggjandi ráðstafanir.

Erum við ekki vön því að síldin komi á síðustu stundu og bjargi þjóðarskútunni? Eða að við komumst í uppgrip og reddum fjárhagnum? Það var t.d. byrjað að tala um það í fjölmiðlum fyrir mörgum árum að herinn myndi fara - en ekki byrjað fyrir alvöru að ræða hvað ætti að gera við svæðið og atvinnulaust fólk fyrr en á 11 stundu.

Og það var byrjað að tala um það fyrir mörgum árum að við ættum að læra af löndunum í kringum okkur hvernig best væri að taka á innflytjendamálum og menningarlegum árekstrum. En við gerðum ekkert í þessu fyrr en sumir bekkir í einstaka skólum eru með 50% nemenda af erlendum uppruna og farið er að heilsa manni í verslunum á ensku. Af hverju undirbjuggum við okkur ekki fyrr?

Kannski er það vegna þess að við erum öll svona - við vitum að hlutirnir reddast og tökum á vandanum þegar hann kemur upp.

Jólin koma á hverju ári - það vita allir, samt spara fáir fyrir jólaútgjöldunum og útgjöldin og visaskuldirnar koma okkur á óvart. En það hefur alltaf reddast hingað til. Hjá flestum alla vega.

Er þetta ekki dálítið einkenni á þjóðinni? Hvað finnst þér? Segðu þína skoðun hér. Kveðja, Sirrý

Á þetta við þig?

*Geymirðu allt (hvort sem þú hefur þörf fyrir það eða langar í það)?

*Viltu endilega draga heim (eða hleypa inn til þín) dót sem þú þarft ekki?

*Gerirðu ekki ráð fyrir að hver hlutur eigi sér sinn stað?

*Leggurðu hluti frá þér og ætlar að ,,ganga frá þeim síðar"?

Þetta er könnun sem ég sá í bókinni ,,BURT MEÐ DRASLIÐ" sem Salka bókaútgáfa var að senda frá sér. Eftir að hafa lesið bókina ,,Viltu vinna milljarð?" um helgina (sem við Heimir ræddum um í morgun í Íslandi í bítið), þá tók ég til við bókina um DRASLIÐ. Og satt að segja þá er þetta bara skemmtileg og lífleg lesning sem hvetur mann til að bretta upp ermar og segja draslinu stríð á hendur. Þarna eru mörg góð ráð um hvernig maður getur kennt börnunum að taka til og hafa röð og reglu á dótinu svo það yfirfyllist ekki allt aftur af drasli. Ég mæli með þessari bók.

Og svo er þetta ágætur tími til að taka til og henda, gefa eða selja það sem maður ekki þarf að nota. Færðin erfið og gott að vera inni og koma skipulagi á hlutina. Ég hef nefnilega fundið fyrir því að þegar allt er í óreiðu hjá manni á heimilinu finnst manni lífið í heild sinni vera miklu flóknara.

Ekki meira í bili - ég er að fara að taka burtu draslið og hvet ykkur til að kíkja á bókina - áður en allt fyllist af jóladóti, jólagjöfum, auglýsingapésum og pappír. En gefið ykkur endilega tíma til að taka þátt í könnuninni hér á síðunni. Og ef þið lumið á góðu ráði til að sigrast á draslinu þá endilega sendu línu hér á blogginu.

Kveðja, Sirrý

Áhorfandi hafði samband við mig og sagði: ,,Fjölmiðlar eru að leggja Árna Johnsen í einelti. Hann er búinn að taka út sína refsingu og hvað er alltaf verið að spyrja hann út í gamalt afbrot? Maðurinn má ekki byrja upp á nýtt?"

Mörður Árnason og Pétur Blöndal sögðu sína skoðun á þessu í Íslandi í bítið í morgun og ungir Sjálfstæðismenn eru óhressir með að Árni sýni ekki iðrun. Hvað finnst þér? Sendu línu um málið. Er nú komið nóg? Eða er Sjálfstæðisflokkurinn í vanda vegna málsins? Og taktu þátt í könnuninni hér á síðunni.

Kveðja,

Sirrý